Bye bye Las Vegas 14.05.2014

so mir wäre üsi letschte stunde am gniesse und verbringe die nach üsem sehr gsunge typisch amerikanische zmorge in downtown. bim nä feine starbucks käffeli düe mir chli d'lüt beobachte, aber natürlech nid läschtere, nume analysiere :-)

nach däm mir downtown verlo hei, si mir no chli is bellagio go roulette spiele, he mir hei mou chli chli gwunne. iz gnämige mir üs üsi hängkersmalzit in vegas bevor mir de üses geliebte mietouto müsse go abgä und richtig flughafe gö üses letsche hemli go verspiele. aber da üses gepäck überwicht het, macht das nüt:-)

so das isch üse letscht blog itrag. merci viu mou aune wo üs die reis hei ghuefe ermügleche und äs het üs gfreud, hei so viu üsi erläbnis mitverfougt.

bis gli ir chaute und nase schwiiz.

dicke muntsche letschte mou us dä USA

fadi & andle

Las Vegas 13.05.2014

üsi ferie gö am ändi zue und mir heis no chli gmütlech gno. mir hei schön lang uspfusset und hei de när ä laange spaziergang übere strip gmacht. mir si s'MGM GRAND und s'EXCALIBUR go aluege, hei dr 4-stöckig M&M's lade erkundet und hei ganz komischi cola us dr ganze wäut probiert. 

am obe hei mir üs de uf richtig downtown gmacht, bim z'nacht hei mir de gmerkt, das mir dr föteler hei vergässe, auso ab is hotel go hole, isch jo nid so wit :-)

las vegas downtown isch dr wahnsinn, dr strip isch zwar gross und mächtig und voller toller hotel und moderner casions, aber a charme vo downtown chunt er nid häre. und bi dä spiuoutomate het mä schiins grösseri gwünnchance. obwous de bi üs bis am schluss wieder eher ä null rundi isch gsi.

morn verbringe mir de üse letscht tag in vegas bevor mir de 21.15 uhr (ortsziit), richtig london abflüge.

Hoover Dam & Downtowm Las Vegas 12.05.2014

hüt am morge früh hei mir im belaggio us checket und hei üs ufe wäg richtig hoover dam gmacht. uf däm wäg hei mir de no ä zwüschehaut bim bekannte stadtigangsschüedli gmacht, wiis säch ghört.

bim hoover dam acho hei mir die riesigi stoumuur afang mou vo witem besichtiget, sehr idrücklech. nachdäm mir ä parkplatz hei gfunge sie mir de chli uf dere muur go spaziere. 

zrugg vom hoover dam hei mir de afang mou üses neue hotel bezoge, vdara, heisst das super und neue hotel und bietet jede luxus ussert äs casino, kommisch in las vegas :-)

nach äm bestuune vo üsem luxusappartement hei mir üs de ufe wäg is alte las vegas gmacht. downtown versprüet ä charme eifach herrlech. glichzitig si mir no bim bekanntischte pfandleih hus vorbi, gold&silver pawn. dört fingt mä vor rado uhr bis zum bild vom picasso oder chagall aues, aber immer no z'tüür für üs.

natürlech isch ou hüt spiele nid z'churz cho und mir hei nach dr brunneshow vom bellagio im flamingo und aria casino chli gspiut. mit ärä bilanz vo -5.40 nidemou so cheibe schlächt.

Las Vegas 11.05.2014

verwache z'las vegas im bellagio hotel, soo schön :-)

hüt hei mir nomou chli site seeing gmacht oder besser gseit hotel seeing. das isch ungloublech die hotel, so gross, kitschig und eifach unreal. mir hei üs im CESARS PALACE zwüsche gucci und armani verlofe, si im MIRAGE go seepfärdli aluege, hei im VENEZIA dr gondoliere ghöre singe, im WYNN hei mir s'blummekarusell bewunderet und si im PALAZZO gsi go bisle. äs isch üs auso vorcho wi näs "leiterlispiu", do inne, ganz wit führe loufe, einisch ume egge und mir si wirder dört gsi wo mir agfange hei. 

das isch nume ä chline teil vo au dene riesige paläscht wo mir do düe bestuhne, aber aui chöi mir nid go aluege, d'gfahr das mir dr usgsng us dene hotel nüm finge isch eifach z'gross. 

nach däm reale "leiterlispiu" hei mir üs erscht mou a pool müsse go erhole. mit liecht verebrönte bei und rügge hei mir üs de putz und gsträut uf suechi nach öpis ässbarem gmacht. im harley davidson cafe hei mir üs de über näs feins z'nacht gfreut und hei das ässe bim nä früsche wind und äm usblick uf die kommische gstaute am strip gnosse.

spöter isch de spiele im bellagio agseit gsi. dasmou hei mir nid so nä gnaui statistik, aber dr obe het de beziite gändet mit eher lichterem portmonee.